Aquesta annada 2013 es estada, coma de costuma, pro activa e animada, levat per los corses que an vist la frequentacion demesir un pauc.
Lo 9 de abrial avèm organizada un rencontre amb Jaume Bonnet que nos parlèt de la condicion obrièra dins la seconda mitat del sègle XIX : a l’entorn de Juli Sibilat e de sa filha Lutece. Nos assabentèt sul companhonatge, l’anarquisme e los fondaments del sindicalisme. Serada força presada que s’acabèt per una macarronada
Lo 25 de junh reçaupèrem André Arnal, acompanhat de Jaume Bonnet, que nos presentèt son libre « Des Juifs et des Justes ». Libre que relata un pan d’istòria familiala amb l’accion de sos grands pendent la segonda guèrra mondiala. La serada finiguèt a l’entorn d’un bon repais als Tres Molins.
Lo 14 de setembre avèm organizada la jornada del patrimòni, en collaboracion amb lo Sindicat d’iniciativas del Faugièrenc : dins la tantossada venda de libres e lecturas de tròces causits amb la participacion de Joan-Marc Vilanòva, Alan Debru e Claudi Caumette ; lecturas que son estada enregistradas en vidèo e que se pòdon retrobar sus nòstre siti internet.
La jornada s’acabèt per lo concèrt de Joanda e sos musicians que recampèt un centenat de personas a la sala Bacchus.
Totes los fraisses d’aquela jornada siaguèron preses en carga per lo SI.
Lo 15 d’octòbre novèl rencontre amb l’amic Jaume Bonnet que nos parlèt de la guèrra granda de 14 /18 pel agach d’un milièrat de letras reçaupudas per Lutèce Sibilat-Rouanet. Siaguèt una serada de las bèlas malgrat lo pauc de participants. L’intervencion de Jaume siaguét tanben filmada en vidèo e se pòt veire sul siti internet.
Enfin, lo dimenge 20 d’octòbre participacion de Claudi Caumette a l’emission « Viure al país » de F3 miègjorn-pireneus, amb un viralenga enregistrat dins las vinhas de Faugièiras e a las cavas cooperativas de Faugièiras e Laurenç. Aquel viralenga, el tanben, se pòt veire sul siti internet.
Los corses setmanièrs se son perseguits tota l’annada, tant a Faugièiras, cada dimars a 6 oras coma a Bedarius lo dimècres.
Aquest’an avèm editat dos libres novèls : Un ramelet de poncha d’alba de Joan-Marc Vilanòva e Felinitats, de Gui Roanet amb una revirada de Claudi Caumette, per aquel los fraisses son estats pres en en carga per l’autor.
Nòstre siti internet creat en 2011, a res non còst, perseguís, el tanben sa polida capitada, avèm passat lo cap de 1000 visitaires. Ven de s’enriquir, coma vos l’ai dich, de tres vidèos e sus aquel siti traparetz totjorn la vida de la nòstra associacion (actualitats, comptes renduts, projèctes) e tanben l’istòria de Faugièiras : lo vin, lo patrimòni, lo protestantisme, la lenga d’òc, los personatges que marquèron la vida del vilatge, i avèm ajustat André de Robert , « Juste parmi les Nations », per son accion pendent la guèrra en favor dels josius, eca…
Fa pauc de temps es estat enriquit d’una galariá de fotòs ont se pòt veire, demest d’autras, 39 fotòs de l’escòla de Faugièiras dempuèi la fin del sègle 19 fins a la debuta del sègle 21.
Lo mesadièr « Lo sauta ròcs » perseguis son camin sens ges de problema e acaba sa desena annada.
En 2013, coma las annadas precedentas, avém fach la causida de faire pas de demanda de subvencion a la comuna, la rason es totjorn la meteissa. A l’ora d’ara las causas s’aprestan a cambiar, saique, aprèp las eleccions del mes de març, las relacions normalas amb la comuna seràn tornamai possiblas.
Fin finala, lo Sauta Ròcs se pòrta plan. En 2013 sèm montats fins a 50 sòcis.
Bona annada a totes e encara mercé.




Aquesta annada 2012 es estada, coma de costuma, pro activa e animada.
Lo 13 de abrial avèm organizada una charradissa amb Joan-Marc Vilanòva que nos presentèt « TROBAR – PASSAR – RENÀISSER » una « Passejada istorica-poetica o 7 sègles de l’istòria nòstra :
Acte 1 – Naissença e triomf – tres cents ans de quista amorosa, tres cents poetas occitans inventan l’educacion sentimentala d’Europa.
Acte 2 – Tempses de malastres – Crosada, desmembrament, inquisicion, guèrras, grandas companhias, pèsta, famina… Tres sègles de mal viure en Païs d’Òc.
Acte 3 – Renaissença occitana… Apuèi, Dieu torna prene lo monde e lo Rei lo poder.
36 personas èran presentas e partejèron un bon repais al Bel-air.
E coma me lo diguèt Joan-Marc : « Me siái encara regalat ! Las risetas e los agaches que costejèron la charradissa me paguèron mil còps de las oras passadas a l’alestir. Coma de costuma, Faugièiras es estat per ieu lo luòc de l’amistat. »
Al mes de junh, d’unes acompanhèron Jaume Bonnet per una passejada d’una jornada, d’en primièr al bòsc dels escrivans combatents, puèi a Douch e sos entorns suls passes del maquis Bir Hakeim.
Los corses setmanièrs se son perseguits tota l’annada, cada dimars a 6 oras e mièja. De mai, sus la demanda dels animators del fogal VERDAGUER de Bedarius, lo Sauta Ròcs a contunhat los corses d’occitan cada dimècres a la sala Verdaguer, aquel cors recampa un desenat de sòcis del fogal e es totjorn bailejat per Claudi Caumeta.
Aquest’an avèm editat dos libres novèls : Al ran del fuòc, contes e novelas, e Joan Raimond qual éra ?, libròt sus l’afar Joan Raimond. Aquelas editions son una capitada, a l’ora d’ara avèm venduts 210 exemplaris de « Imatges de Faugièiras », 119 exemplaris de « Al ran del fuòc » e 56 libròts « Joan Raimond ». Uèi avèm gaireben equilibrat los comptes.
Dos autres libres son estats editats jos l’egida de l’associacion mas totes los fraisses siaguèron pres en carga per los autors, Gui Roanet e Claudi Caumette ; s’agis de « Escala per la garriga » e de « Lo degan Sardinoux quel èra ? »
Nòstre siti internet creat en 2011, a res non còst, es, el tanben una polida capitada, avèm passat lo cap de 550 visitaires. Sus aquel siti traparetz totjorn la vida de la nòstra associacion (actualitats, comptes renduts, projèctes) e tanben l’istòria de Faugièiras : lo vin, lo patrimòni, lo protestantisme, la lenga d’òc, los personatges que marquèron la vida del vilatge, eca…
Fa pauc de temps es estat enriquit d’una galariá de fotòs ont se pòt veire, demest d’autras, 39 fotòs de l’escòla de Faugièiras dempuèi la fin del sègle 19 fins a la debuta del sègle 21.
Lo mesadièr « Lo sauta ròcs » perseguis son camin sens ges de problema.
En 2012, coma las quatre annadas precedentas, avém fach la causida de faire pas de demanda de subvencion a la comuna, la rason es totjorn la meteissa. A l’ora d’ara las causas son a cambiar, saique las relacions normalas amb la comuna seràn lèu tornamai possiblas.
Fin finala, lo Sauta Ròcs se pòrta plan. En 2012 sèm montats fins a 48 sòcis, malurosament, demest eles, dos nos an quitats, emportat per la malautia, Ròsa e Joan-Pèire sardinoux nos mancan plan.
Bona annada a totes e encara mercé.




Aquesta annada 2011 es estada de la meteissa mena que la de 2010, pro activa e animada.
A la debuta, participacion a la dictada occitana al CIRDOC, amb Hellen Bousquet, Danièla Cabròl e Crestian Pegurièr.
Lo 17 de mai avèm organizada una charradissa amb Jaume Bonnet que nos parlèt de la « La resisténcia dins los cantons nauts d’Erau », 36 personas èran presentas. Coma me lo diguèt Jaume Bonnet : « Parce que le verbe « résister » se conjugue au présent, il faut entretenir une connaissance et une culture de ce qui s’est passé réellement en 40.44. »
A la demanda generala, Jaume Bonnet tornét le 14 de octobre de 2011 per nos assabentar sus « l’istòria del Zerò – El Andalus tèrra de tolerància activa. » 25 personas, que qualques amics gabianencs éran dins l’impossiblitat d’èsser presents, escotèron amb una granda atencion cossi, amassa, crestians, josieus e arabs contribuiguèron al desvolopament de la cultura e de la civilisacion nòstras
Los corses setmanièrs se son perseguits tota l’annada, cada dimars a 6 oras e mièja. De mai, sus la demanda dels animators del fogal VERDAGUER de Bedarius, lo Sauta Ròcs a continuat los corses d’occitan dos còps per setmana a la sala Verdaguer, aqueles corses recampan un vintenat de sòcis del fogal e son bailejats lo diluns per l’amic Hellen Bousquet, e lo dimecres per Claudi Caumeta.
Lo libre « Imatges de Faugièiras » es una pichòta capitada, a l’ora d’ara n’avèm venduts 177 e ofèrts 7, e avèm començat de ganhar un pauc de moneda. Aquel libre que recampa de cronicas faugieiròlas dels sègles XIX e XX, presentat a l’encòp en francés e en occitan, es totjorn en venda al prètz de 15 €.

Lo mesadièr « Lo sauta ròcs » perseguis son camin sens ges de problema, es paregut amb regularitat cada mes, e mai se la « sorga » Irenee Martin es ara agotada. Mercé a Lea Monforte per los polits tèxts que me balhèt e que la revirada siaguét, per ieu, un vertadièr plaser, dos d’aqueles tèxts son tanben estats publicats dins la revista bimestriala avaironesa « Patrimòni », d’autres seguiràn la meteissa dralha.
Fin finala, lo Sauta Ròcs se pòrta plan. En 2011 sèm montats fins a 45 sòcis, e avèm ja 3 novèls per 2012 çò que compensarà d’eventualas partenças.
Los projectes abituals de l’associacion se perseguiràn en 2012 : conferéncias, corses d’occitan, mesadièr…
Per ara son ja previstes : conferéncia amb Joan-Marc VILANÒVA, la lenga d’Oc, dels trobadors fins a la revolucion : grandor, descasença, e respelida ; sortida dins lo campèstre faugieirol amb Alan Debru, estudi de la toponimia.
Coma l’avèm anonciat l’an passat deuriam editar un segond libre, es ja quasi prèst a êsser estampat.


© Tous droits Réservés - 2013 - "Lo Sauta Ròcs"